Н.Энхбаяр ”Та нар МАН-аас М.Энхболдыг, АН-аас Баттулгыг, МАХН-аас Н. Энхбарыг өрсөлдүүлчих л дээ...”

МАХН-ын дарга Н. Энхбаяр СЕХ-нд  сонгуулийн хуульд заасан нээлттэй ил тод байх ёстой гэсэн зарчмын дагуу тайлбар хийх хүсэлт тавьсан.   Энэ сарын 14-нд СЕХ  руу орж тайлбар өглөө.

Тэрээр СЕХ-нд өгсөн тайлбартаа “ Би 2009 оны Өршөөлийн хуульд хамрагдсан учраас надад оноосон  үндсэн болон нэмэлт ял байхгүй. Хоёрдугаарт, Монгол Улсад сүүлийн таван жил байнга оршин суусан байх гэсэн заалт  байна. Энэхүү  заалт  үндсэн хуульд зааснаар тухайн нэр дэвшигч Монгол улсынхаа улстөр нийгэм эдийн засгийн асуудлаар тодорхой мэдлэг, мэдээлэлтэй юу гэдгийг тогтоох агуулагатай  заалт. Тэгэхээр миний хувьд МАН, АН –аас нэр дэвшигч М.Энхболд, Х. Баттулга нараас Монгол Улсынхаа улстөр нийгэм эдийн засгийн талаар илүү биш ээ гэхэд дутуу мэдлэг мэдээлэлтэй биш гэж бодож байгаа.

Оршин суусан гэдгийг хуулиар хэн тогтоох эрхтэй гэхээр тухайн хорооны Засаг дарга лавлагаа гаргаж тогтоодог. Тэгэхээр би Сүхбаатар дүүргийн наймдугаар хорооны 3-ын 100-н тоотод оршин суугч.  Сүүлийн 20 жил энд амьдарч байна. Ерөөсөө би хаягаа өөрчлөөгүй хаа нэгэн газар оршин суугаагүй. Тийм учраас би байнгийн оршин суугч.

Харин хүндэтгэн үзэх шалтгаанаар Солонгос болон бусад орнуудад түр хугацаагаар яваад ирсэн. Хэрэв гадаадад оршин суусан бол тэндхийн хаягаар тусгай виз авах, эсвэл цалин авах ажиллаж амьдрах болно. Тэгвэл миний хувьд Солонгос болон бусад улсаас авсан лавлагаагаар бол би хаан ч оршин суугаагүй болно. Би түр хугацаагаар орж гарсан. Би аль нэгэн оронд зургаан сараас дээш хугацаагаар оршин суугаагүй. Би хаана ч оршин суух хүсэл байхгүй. Би Монголдоо л төрсөн. Монголдоо л үхнэ. Монголынхоо төлөө зүтгэнэ. Ийм л тайлбар өгөхөөр бид ирсэн. Харамсалтай нь биднийг оруулахгүй байсан.

СЕХ яагаад оруулахгүй байгаагаа тайлбарлаж чадахгүй байсан. Уг нь багтаамжаараа хэдэн ч хүн орж болно гэсэн хуультай. Надаас гадна хоёр гурвуулаа орлоо. Уг нь 20 -оод хүн багтах багтаамжтай харагдлаа. Гэхдээ яахав асуудлыг аль болох хурцатгахгүйн тулд гурван хүн орооч гэсэн бид хүсэлтээр нь боллоо.

Тусгайгийн залуучууддаа хандаж хэлэхэд та нар Монгол улсыг луйварчидтай хамт нийлж идэхгүй  шүү. Та нар луйварчдын хамгаалалт болж болохгүй шүү. Эзэн Чингис хааны сүр сүлд биднийг харж байгаа шүү. Монгол улсдаа монголын ард түмэн сайхан амьдрах ёстой шүү. Монголчууд айж сандарч, эрхээ хасуулж, өмчөө булаалгаж, дээрэмдүүлж, зодуулж амьдрахгүй шүү. Би энэ үгийг энэ залуучуудад хандаж дахин хэлж байна. Дээр ч хэлсэн.

Ер нь Монгол улс монголын ард түмний төлөө л оршин тогтнож байгаа. Түүнээс биш энэ хүмүүс бухимдаад байх  юм бол энд бөөн үймээн болно. Та бүхэн минь тайван байцгаа. Энэ цагдаа нар наанаа энэ хувцсыг өмссөн ч гэлээ цаанаа бол Монголынхоо төлөө бодож, шаналж байгаа гэж ойлгож байна. Ингээд Монгол Улс маань жинхэнэ ардчилсан улс болох болтугай.

Сая СЕХ-ныхонд хандаж та нар МАН-аас М.Энхболдыг, АН-аас Баттулгыг, МАХН-аас Н. Энхбарыг өрсөлдүүлчих л дээ. Тэгээд л ард түмэн хэнийг сонгохоо мэднэ гэдгийг л хэллээ” гэв.