Гал унтраах техникийн олон төрөлт спортын Улсын аварга шалгаруулах тэмцээн зохион байгуулна

        Гал унтраах техникийн олон төрөлт спортыг хөгжүүлэх, олон улсын түвшинд хүргэх, албан хаагчдын мэргэжлийн ур чадвар, авхаалж самбаа, бие бялдрыг хөгжүүлэх, тэсвэр хатуужил олгох, албаны бэлтгэл бэлэн байдлыг хангах, Онцгой байдлын албыг иргэд, олон нийтэд сурталчилах, энэ спортоор хичээллэх албан хаагчдын тоог нэмэгдүүлэх зорилгоор Онцгой байдлын ерөнхий газар, Гал унтраах техникийн олон төрөлт спортын хороотой хамтран Гал унтраах техникийн олон төрөлт спортын Улсын  аварга шалгаруулах 19 дэхь удаагийн тэмцээнийг 2014 оны 06 дугаарсарын 14-16-ны өдрүүдэд Нийслэлийн Сонгинохайрхан дүүргийн Баянхошуу дахь спорт цогцолборт зохион байгуулах гэж байна.

Тэмцээнд Бүсийн аварга шалгаруулах тэмцээнээс эрх авсан Улаанбаатар бүсийн “Гандуулга” клубын 5 баг,  Зүүн бүсийн “Шонхор” клубын 4 баг, Хойд бүсийн “Алтангадас” клубын 6 баг, Төвийн бүсийн “Од” клубын 4 баг, Баруун бүсийн “Алтайн бүргэд” клубын 1 баг нийт 20 багийн 160 тамирчин  оролцох бөгөөд Довтолгооны шат болон саадтай 100 м-ийн гүйлт, Гурав сунадаг шатны тэмцээн, Хоёр төрөлтийн тэмцээн, 4х100 м-ийн буухиа гүйлт, Байлдааны тархалт зэрэг 5 төрөлд тэмцээний дүнг нэгтгэн хамгийн сайн амжилт үзүүлсэн дэс дарааллаар байр эзлүүлэх юм.

Мөн Онцгой байдлын албаны 10 жилийн ойн нэрэмжит Гал унтраах техникийн олон төрөлт спортын үзүүлэх тоглолтыг 2014 оны 06 дугаар сарын 19-ний өдөр тус спорт цогцолборт зохион байгуулах бөгөөд Улсын аварга шалгаруулах тэмцээнд амжилттай оролцож довтолгооны шатны төрөлд амжилтаараа эхний 16 байр, саадтай 100 метрийн төрөлд эхний 8 байр, 4х100 метрийн буухиа төрөлд эхний 4 байр эзэлсэн баг тамирчидыг  сонгож, оролцуулах юм байна.