Тусгай хамгаалалттай газар нутгийн талаар өгүүлэх “Гоо Монгол” комик ном бүтээжээ

Монгол Улсын дархан цаазат болон байгалийн цогцолбор, байгалийн нөөц, дурсгалт гээд нийт 68 газрын үнэт чанар, зүй тогтол, ан амьтдын шинж төлөвийг танин мэдүүлсэн зурагт өгүүлэмж бүхий 42 нүүрнээс бүтсэн 12 дэвтэр буюу цуврал  хүүхдийн “Гоо Монгол” комик номыг бүтээжээ.

Энэхүү цуврал номын “Гоо Монгол” комик номын төслийн хүрээнд бүтээсэн бөгөөд уг төсөл нь нэг жилийн хугацаанд бүрэн хэрэгжиж дуусах юм.

“Гоо Монгол” комик номын үр нөлөөгөөр энэ цаг үеийн монгол хүүхдүүд төрөлх орныхоо байгаль орчны зүй тогтол, ан амьтдын шинж төлөвийн талаар нарийн тодорхой ойлголттой болохын сацуу хүн ба байгалийн зөв зохистой харилцаанд суралцах юм. Үүгээр ч үл барам тус номыг бусад улс орны хэл дээр хэвлэн түгээснээр дэлхийн хэмжээнд Монголын газар нутгийн гайхамшиг хийгээд онцлогийг танин мэдүүлэх өндөр ач холбогдолтой юм.

Монгол Улсын төрийн онцгой хамгаалалтанд байдаг газар нутгаас 68-ыг нь сонгон авч уг номонд тусгах агаад 1-2 дэвтэрт Хөвсгөл аймгийн Тэнгис-Шишгид, Улаан тайга, Хорьдол Сарьдаг, Хөвсгөл далай, Даяндээрхийн агуй гэсэн таван газар багтаж байгаа аж.

Энэ мэтчилэн үлдсэн 63 газрыг 10 дэвтэр номонд багцлан оруулах байдлаар тухайн газар тус бүрийн түүх, домгийг уран зохиолын шинэлэг хэлбэрт шилжүүлэн зургийн зохиолыг нь гаргах юм байна.

Мөн газар тус бүрт орших нэн ховордсон амьтдын талаар тус цуврал номонд зураглан өгүүлэх аж.

Түүнчлэн эхний дэвтэр нь андройд ухаалаг утсанд суурилсан хэлбэрээр гарсан тул доорхи энэ линкээр татаж авна уу.