АМРАЛТЫН ӨДРҮҮДЭЭР ШАР ӨВСНИЙ ТҮЙМЭР НЭМЭГДЭХ ХАНДЛАГАТАЙ БАЙНА

Өнөөдөр нийслэлийн удирдах ажилтнуудын шуурхай зөвлөгөөн болсон юм. Шуурхай зөвлөгөөнөөр Онцгой байдлын газрын дарга А.Дашням амралтын өдрүүдэд шар өвсний түймэр нэмэгдэх хандлагатай байгаа талаар мэдээллээ.

Нийслэлийн Онцгой байдлын газрын дарга А.Дашням: “Нийслэлийн хэмжээнд тавдугаар сарын 1-нээс 9-ны өдрүүдэд Гал түймэр унтраах, аврах ангиуд объектын гал түймрийн 44, аврах ажиллагааны тав, нийт 49 удаагийн дуудлаган дээр үүрэг гүйцэтгэсэн. Дээрх хугацаанд аюулт үзэгдэл, ослоос зургаан иргэнийг аварч, 1.5 тэрбум төгрөгийн эд хөрөнгийг авран хамгаалж ажиллаа. Он гарснаас хойш нийслэлийн хэмжээнд объектын гал түймрийн 668, аврах ажиллагааны 73, нийт 741 удаагийн дуудлагатай байгаа нь өнгөрсөн оны мөн үеийн нийт дуудлагатай харьцуулахад 20.8 хувиар буурсан үзүүлэлттэй байгаа юм.

Сүүлийн үед амралтын өдрүүдээр шар өвсний түймэр нэмэгдэх хандлагатай байна. Өнгөрсөн долоо хоногт Гал түймэр унтраах анги болон эргүүлийн бүрэлдэхүүн нийт найман удаагийн өнжмөл шар өвсний гал түймрийн дуудлагаар ажиллаж, 6.2 га талбай шатаж байсныг унтраасан. Мөн цаашид үер, усны эрсдэлээс сэргийлэх ажлыг зохион байгуулна” гэж мэдээллээ.