МОНГОЛ УЛС МОДОН БАРИЛДААНЫ ДЭЛХИЙН АВАРГАТАЙ БОЛЛОО

Модон барилдаан буюу Мас-Рестлингийн Дэлхийн аварга шалгаруулах тэмцээнд Монгол Улсын 26 тамирчин оролцож, 1 алт, 3 мөнгө, 9 хүрэл, нийт 13 медаль хүртсэн амжилт үзүүлжээ.

Тэмцээнд Киргизстан улсын нийслэл Бишкек хотноо энэ оны арваннэгдүгээр сарын 30-наас арванхоёрдугаар сарын 1-ний өдүүдэд болов. Тэмцээний өсвөр үе, насанд хүрэгчид, үнэмлэхүй жингийн зэрэг 23 ангилалд 39 орны 265 тамирчин өрсөлджээ.

Эрэгтэйчүүдийн 80 кг-ийн жинд Улаанбаатар хотын харьяат, 20 настай тамирчин У.Нарантогтох Киргизийн тамирчинтай өрсөлдөж, 2:0 онооны харьцаагаар ялж, алтан медаль хүртсэн байна. Модон барилдаан буюу Мас-Рестлингийн спортоор Монгол Улсаас анх удаа алтан медаль хүртэж буйгаагаа онцлог юм.

Манай улсын тамирчид нийт 1 алт, 3 мөнгө, 9 хүрэл, нийт 13 медаль хүртсэн амжилт үзүүлж багийн дүнгээр 3-т эрэмбэлэгдэж хүрэл цомын эзэд болжээ. Мөн Модон барилдааны дэлхийн аварга шалгаруулах тэмцээнийг 2025 онд эх орондоо зохион байгуулах эрхийг авчээ.

Мас-рестлинг буюу модон барилдаан нь ОХУ-ын Сахагаас эхлэлтэй бөгөөд бие бялдар, оюун санааны бэлтгэлийн бэлгэдэл спорт аж. Энэхүү спорт нь хүүхэд, залуучуудад хүмүүжил, төлөвшил,  бие бялдар, оюун санааны боловсрол олгох олон талын ач холбогдолтой юм байна.