Л.Оюун-Эрдэнэ: Бид нийгмийн нэг сэтгэл зүйн урсгалд орж байж түгжрэл, утааны ард гарна

Ерөнхий сайд болон Хотын дарга тэргүүтэй алба хаагчид уулын хурдны замын трассын гүүрэн тунель огтлолцох цэгт ажиллалаа.

Засгийн газраас 2025 оныг "Нийслэлийн дэд бүтцийн хөгжлийг дэмжих жил”болгон зарласан. Энэ хүрээнд Улаанбаатар хотод хэрэгжүүлэх төсөл, арга хэмжээний хэрэгжилтийг эрчимжүүлэх Шуурхай штаб байгуулсан. Шуурхай штаб өнөөдөр хуралдаж, Туулын хурдны замын ажлыг эрчимжүүлэхээр болов.

Тус зам нь Налайхын дөрвөн эгнээ авто зам буюу Баянзүрх гүүрээс эхэлж, Сонгинохайрхан дүүргийн нутагт орших баруун аймгууд руу салдаг аюулгүйн тойрог хүртэл нийт 32 км үргэлжилнэ.

Туулын хурдны зам баригдсанаар Улаанбаатар хотыг тойрон гарах тасралтгүй хөдөлгөөн бий болж, түгжрэл буурна гэв.
Ерөнхий сайд Л.Оюун-Эрдэнэ:
Энэ 2025 онд бид бүсчилсэн хөгжлийн бодлогод тулгуурлан нийслэлийн асуудалд анхаарал хандуулан ажиллах болно. Өнөөдөр шуурхай штабын ажлын хэсэг Туулын хурдны замын трассын гүүрэн тунель огтлолцох цэгт ажиллалаа. Энэ бол байнгын ажиллагаатай штаб юм.  

Энд ямар ч гэрлэн дохиогүй, уулзваргүй, хэвтээ тэнхлэгийн зургаан эгнээ хурдны зам тавина.

Гэр хорооллыг тойрсон тойрог хурдны замыг 2028 он гэхэд ашиглалтад оруулна

Нийслэлээс 24 сарын хугацаанд хийнэ гэж байгаа ч бид үүнээс бага хугацаанд хийхийг хүссэн. Үүнд газар чөлөөлөлт болон хөрөнгө оруулалтын хэд хэдэн ажил хийнэ. Аливаа ажлыг гацаадаг хэсэг бүлэг хүмүүс байдаг. Хэрэв гацвал бид түгжирсэн хэвээрээ л байх болно. Тиймээс тодорхой хэмжээний захиргаадалтын арга хэмжээ авна. Тэгэхээр Ерөнхий сайдын хувиар оны эхэнд уриалж байна. Бидэнд үүнээс өөр шийдэл байхгүй.

Мөн LRT болон метроны төсөлтэй холбоотой хэд хэдэн төлөвлөлтийг хийж байна. Түүнээс гадна олон жилийн хугацаанд нийслэлд энэ мэт ажлыг "үүрүүлэх" гээд болсонгүй. Тиймээс УИХ, ЗГ, хотын удирдлага ААН-үүдийн татварын нэг хувийг тулгамдсан асуудал бүхий агаарын бохирдол, эрчим хүч, түгжрэлтэй холбоотой багц шийдвэр гаргана. Бид нийгмийн нэг сэтгэл зүйн урсгалд орж байж л үүний ард гарна. Тиймээс нийслэлчүүд, ААН-үүддээ уриалж буй. Үүнд тусгайлан хэд хэдэн хууль батална.

Монгол Улсын Тэргүүн шадар сайд Л.Гантөмөр:
- Хөрөнгө оруулалтын бодлогыг бид Улаанбаатар хот руу чиглүүлж байна. Хотын зүгээс Туулын хурдны замыг 2 жилд хийхээ мэдэгдээд буй, энэ нэгдүгээр сард тендерээ зарлахаар болсон. Эхлээд 4 эгнээ гэж байсан ч 6 эгнээ хийхээр төлөвлөсөн.

Мөн гэр хорооллыг тойрсон тойрог хурдны замыг 2028 он гэхэд ашиглалтад оруулна, зураг төслийг хийж байгаа ба 6 дугаар сард гүйцэтгэгчийг шалгаруулна.